A subdelegada do Goberno na Coruña, Pilar López-Rioboo, visitou esta mañá o Centro de Atención Integral Amicos e supervisou o proceso de adaptación dos 94 colexios e as 134 mesas electorais do partido xudicial de Noia, mediante o cal se posibilitará que poidan exercer o seu dereito a voto ao redor de 7.000 persoas con discapacidade intelectual censadas nesta área.
Acompañada pola vicesecretaria da Delegación do Goberno de Galicia, Eva Vázquez; a presidenta da Asociación Amicos, Esther Vidal; a vicepresidenta, Digna Iglesias; o director xeral, Xoán España; e Marcelino Romero e Manuel García, usuarios da entidade; a subdelegada do Goberno valorou de maneira moi positiva a pioneira experiencia desenvolvida o pasado 26 de maio no colexio electoral situado no Centro de Educación Infantil e Primaria (CEIP) de Pazos-Comoxo, no municipio de Boiro, onde votaron ao redor de media centena de persoas con discapacidade intelectual das oitenta que naquel momento tiñan esa posibilidade.
Neste senso, insistiuse na necesidade de continuar traballando para acadar a igualdade que establece a lei, de tal forma que tanto a Subdelegación do Goberno na Coruña coma a propia Delegación do Goberno aceptaron o reto de seguir participando activamente no proxecto piloto posto en marcha pola Asociación Amicos, confiando en que nas próximas eleccións sexan xa o Ministerio de Interior e o Ministerio de Política Territorial os que poidan regular este proceso.
O domingo electoral situaranse na entrada dos 94 colexios electorais do partido xudicial de Noia pictogramas informativos que indicarán as distintas mesas electorais e marcarán a actividade nas cabinas de votación, a mesa de papeletas e as propias mesas onde se vota. Deste xeito, aportarán información sobre os horarios, a secuencia para garantir o voto secreto, a selección e introdución das papeletas nas urnas e a secuencia explicativa para exercer o voto en urna, ademais da indicación das urnas do Congreso e Senado. Tódolos pictogramas están avalados polo Ministerio de Sanidade, Consumo e Benestar Social, así como a Secretaría de Estado de Servizos Sociais.
O proceso, que sigue sendo pioneiro en Galicia aínda que non único, facilitará a participación das persoas con discapacidade con dereito a voto e será aproveitable na súa aplicación para persoas maiores, facilitando a comprensión dos pasos para exercer o sufraxio nas mesas electorais dos concellos comprendidos no partido xudicial de Noia.
Os colexios electorais atópanse distribuídos por Boiro, Lousame, Mazaricos, Muros, Noia, Outes, A Pobra do Caramiñal, Porto do Son e Ribeira. A Asociación Amicos foi a encargada de preparar o manual e material necesario para a adaptación dos locais e mesas electorais, mentres que a Subdelegación do Goberno asumiu o custo de envío da documentación aos concellos do partido xudicial. Así mesmo, a iniciativa conta co apoio da Xunta Electoral de Zona de Noia.
