Os socialistas de Ribeira presentarán en pleno dúas cuestións relativas á reordenación do tráfico con semáforos na ribeirense rúa Romero Ortiz. Segundo manifestan, na sesión plenaria ordinaria correspondente ao mes de outubro aprobouse por unanimidade a súa proposta en relación ao proxecto de humanización da citada vía, incorporándose a emenda do PP sobre a colocación de dous semáforos, mentres non se acometa a obra, co obxectivo de reordenar o tráfico.
O grupo municipal do PSdeG-PSOE apunta que nestes días pasados, operarios do servizo de obras do Concello procederon á colocación de sinais de tráfico na praza de Compostela. Engade que un conxunto de dous semáforos “pregables e portátiles” son “ideais para regular o tráfico nas rúas de dobre sentido”, precisando que poden ser adquiridos por aluguer nas empresas de subministro de maquinaria ou por compra por “un módico prezo.”
Por todo isto, fará as seguintes preguntas: “1. Sr. Alcalde, en vista do exposto, pode dicirnos cal é o motivo da demora en colocar estes semáforos para regular a circulación rodada na rúa Romero Ortíz? 2. Que significa para o Goberno a locución ‘de forma inmediata’.”
