Continúa o xuízo polo crime de Diana Quer. Na sesión de hoxe, axentes da Garda Civil afirmaron que a sinal da antena que daba cobertura ao móbil da moza madrileña proba que volvía á casa polo paseo do Areal. A súa posición está determinada en cada momento porque en poucos minutos, Diana escribe numerosas mensaxes, estando conectada á rede continuamente.
No cruce entre O Areal e a rúa Venecia, o móbil da moza comeza a lanzar sinais raros, como se o golpeasen ou o tapasen. Os técnicos cren que foi alí onde se produciu o ataque de José Enrique Abuín, xa que aseguran que “estanse pulsando teclas de maneira errática e ademais ese terminal está sendo obstruído por algo. Algo que se puxo. Puido ser un corpo, dentro dun vehículo. Á vez que se está manipulando o teléfono está sendo ocultado.”
Na ponte de Taragoña, o móbil de Diana perde a súa conexión cando se arroxa ao mar, pero o de Abuín segue ata a nave de Asados, onde apareceu o corpo da moza, lugar no que permanece, como mínimo, máis dunha hora.
Á pregunta “pódese determinar que ás 03.09 o acusado estaba na zona da nave de Asados?”, un axente responde “sen ningunha dúbida.”
A sesión tamén contou co testemuño dun capitán da Garda Civil que apuntou que, unha vez detido Abuín, cando foron ata a nave “non quere avanzar. ‘Por que non queres avanzar? Que é o que hai? Que é o que non hai?’ Di ‘está nunha arqueta que hai aí, non é exactamente un pozo, é unha arqueta. Non quero ir porque teño gravada a cara da nena porque volvín aquí e volvina ver porque vin a comprobar’.”
