Se ben o Gran Wyoming apenas necesite presentación pola súa faceta como comunicador retranqueiro na TV (dende El Intermedio ou Caiga Quien Caiga), se cadra si que é preciso lembrar que, amais de ser presentador e humorista, o Wyoming foi, é, e será músico de rock and roll e de blues, primeiro na compaña do xa falecido Maestro Reverendo e logo voando en solitario polos ceos da música. Aparte diso, José Miguel Monzón (Wyoming) tamén é actor, director, escritor e médico, pero estas facetas non deberan ter relación, a priori, co concerto que vai ofrecer esta fin de semana en Boiro, na Pousada da Galiza Imaxinaria.
A cita será o venres 8 de novembro ás 22.30 horas. A entrada anticipada sae a 12 euros (pódese mercar en liña) anticipada, e a 15 na billeteira. Wyoming (guitarra e voz) virá acompañado da banda de insolventes cos que se deixa caer pola nosa terra (por exemplo na pasada edición do Festival de Cans), que son Miguel Ariza, guitarra solista e coros, Jose Alberto Solís, baixo, Manolo Villalta, teclado, e Luis de Diego, batería. Todo apunta a que o concerto será un agasallo para os seareiros do rock de raizames clásicas, envolvente e de facetas enérxicas. Como ben saben os que xa tiveron a sorte de escoitalos, Wyoming e os Insolventes adoitan revisitar algunhas das cancións clásicas que máis marcaron cadansúas formacións musicais artísticas, remontándose ás orixes do rock e abordando, tamén, temas de meirande actualidade, sen descartar as homenaxes a Rosendo ou aos galegos Siniestro Total.