O Bloque Nacionalista de Boiro, liderado por Raquel Suárez Regades, vén de presentar unha moción para axilizar a posta en marcha de políticas efectivas que contribúan a solucionar un problema que as galegas e galegos levamos arrastrando dende hai centos de anos: o drama da emigración, unha eiva que, lonxe de esmorecer, semella ir a máis (a agrupación lembra que na época en Rosalía escribiu Pra a Habana!, hai 156 anos, a poboación galega representaba o 11,5% do total do Estado, e hoxe é só do 5,74%, “o que significa que o peso relativo da nosa poboación reduciuse á metade”).
Na moción, que será levada ao pleno de Boiro en decembro, o BNG lanza unha proclama para pedir ao Parlamento galego que “tome en consideración a emigración como un drama social e nacional, para que conciba este problema como unha emerxencia e outorgue prioridades ás políticas que ataquen as súas causas, instando á Xunta a impulsar estratexias que aseguren o dereito a un traballo digno na terra e creen as condicións para favorecer o retorno das persoas emigradas”. Tamén se propón instar ao Parlamento para que estude e propoña medidas e políticas necesarias para rematar “con este drama que segue a golpear ao Pobo Galego”. Segundo o BNG boirense, estes deberán ser os eixos das ditas políticas:
-Defender a base produtiva do país e dunha economía autocentrada, que mobilice os enormes recursos da nosa terra para xerar emprego e riqueza.
-Crear emprego digno e de calidade.
-Promover os sectores estratéxicos de noso: agrogandeiro, forestal, marítimo-pesqueiro, enerxético e das Tecnoloxías da Información e a Comunicación (as TIC), así como a economía creativa, na que “Boiro ten referentes destacados”.
-Activar políticas que eviten a emigración da xente nova.
