O responsable comarcal do BNG, Luís Pérez Barral, vén de dar a coñecer a valoración da formación respecto aos resultados electorais deste domingo. Pérez Barral manifesta que é “unha boa noticia que o Bloque” volva a ter representación porque, segundo precisa, será garantía de que Galicia exista con “voz propia”, ademais de contribuír a que no Estado “non se produza ningún tipo de involución democrática.” Neste senso, explica que a forza nacionalista estará aí para que se produza “un goberno de progreso”, marcado por “unha axenda galega e con solucións aos problemas do noso país.”
Así mesmo, o responsable comarcal expresa o seu agradecemento a tódolos galegos e galegas que confiaron no BNG, así como á militancia, colectivos, Compromiso por Galicia e persoas “sen o carné do BNG” que co seu voto posibilitaron o retorno deste partido ao Congreso a través de Néstor Rego, quen se presentou como candidato pola provincia da Coruña.
Por outra banda, o Bloque amosa a súa preocupación debido ao peso da “extrema dereita” no novo panorama político, sinalando como responsables ao Partido Popular e Ciudadanos por pactar con Vox “normalizando a un partido xenófobo, racista, machista e antigalego”, así como ao PSOE e Podemos por “non plantarlle cara na campaña electoral contribuíndo ao seu branqueamento.”
Respecto a Vox, Pérez Barral esgrimiu que “hai que desenmascarala e denunciar que non é unha forza política democrática”, enumerando, entre outras cuestións, que “mesmo se atreveu a defender a ilegalización da Xunta de Galiza, do Parlamento de Galiza e do BNG.” Ademais, engade que, se Vox non obtivo representación en Galicia, “foi o escano do BNG o que lle parou os pes.”
O responsable comarcal reitera que o Bloque é unha forza política que “vai a alza e suma”, continuando na senda de “coa man tendida a todos os galegos e galegas que cren que Galiza precisa dunha alternativa como a que representa o BNG” para no 2020, tal e como apunta, “alonxar” da Xunta de Galicia ao Partido Popular.
