O xuízo polo asasinato de Diana Quer xa ten xurado popular. Cinco homes e catro mulleres serán os encargados de analizar as probas para determinar o grao de culpabilidade nos feitos do único acusado, José Enrique Abuín, alias ‘O Chicle’.
Tras contar co mínimo de candidatos esixido por lei, as partes tardaron pouco máis dunha hora en realizar as entrevistas para elixir aos 9 titulares e dous suplentes deste xurado.
O Tribunal Superior de Xustiza de Galicia informou hoxe da constitución deste órgano xudicial, algo que resultou posible a pesar das alegacións presentadas durante a xornada por motivos médicos, de estudos, coñecemento da familia da vítima e ser xurado en anteriores ocasións.
Hai dúas semanas, o proceso tivo que anularse despois de que as escusas presentadas por varios dos preseleccionados non alcanzasen o mínimo de 20 candidatos esixidos para realizar esta selección. Nesta ocasión, con todo, non houbo contratempos e o xuízo poderá iniciarse este martes.
