Unha nova cita deportiva chega esta fin de semana. Así, este domingo 1 celebrarase a XV Carreira Popular ‘Mar de Boiro’-13º Memorial Pepe Buceta, a cal se enmarca na cuarta edición do Circuíto de Carreiras Populares Arousa Norte 2019 e no sétimo Circuíto Provincial de Carreiras Populares da Deputación da Coruña. Así o deron a coñecer esta mañá o alcalde de Boiro, José Ramón Romero; o concelleiro de Deportes, Marcos Fajardo; o técnico do departamento de Deportes, Manuel González; e o director deportivo de Barbantia Roda, José Navarro.
A proba consta de tres distancias distintas: as carreiras Mini e Supermini, de 200 metros, ata os 7 anos; a carreira curta, de 2.500 metros, para escolares; e a carreira longa, de 10.000 metros, para a categoría xeral. A carreira longa sairá as 11.00 horas da rúa Principal, onde se fará o corte da cinta, percorrendo a avenida de Compostela dirección praia Xardín, o paseo marítimo ata O Saltiño, chegará ata Mañóns e volverá a Boiro, situándose a meta na rúa peonil.
A entrega de trofeos está prevista para as 12.15 horas na praza do Concello, premiando aos tres primeiros clasificados de cada categoría e aos tres gañadores absolutos, tanto masculino coma feminino. Tamén se outorgarán premios aos tres primeiros corredores e ás tres primeiras corredoras, empadroados actualmente en Boiro, en cruzar a liña de meta; ao participante de maior idade; e medallas para os participantes das carreiras Mini, Supermini e curta.
Polo de momento hai ao redor de 700 inscritos, agardando superar esta cifra. Os interesados dispoñen ata as 23.59 horas do xoves 28 para anotarse a través da páxina web www.emesports.es.