O Concello de Boiro, xunto coa Conselleira de Economía, Emprego e Industria, pon en marcha o programa Boiro Emprega, enmarcado nos Programas Integrados de Emprego de Galicia. Unha iniciativa que ten como obxectivo actuar de maneira efectiva sobre a empregabilidade no municipio e a inserción laboral.
A formación é un dos aspectos de maior incidencia sobre as posibilidades de mellora e inserción laboral, por iso as accións deste programa inclúen unha combinación de actividades de carácter individual e colectivo, que buscan desenvolver as capacidades prelaborais dos candidatos, mellorar e incrementar as competencias profesionais, achegar os usuarios ao mercado laboral e familiarizalos coas ferramentas de procura de emprego.
As accións formativas constan de varios itinerarios coma son turismo, administración e xestión, industria de produción e envasado. Ademais desta preparación para o emprego, recibirán tamén instrución transversal e obradoiros para a mellora de habilidades necesarias para a ocupación laboral. Así mesmo, os usuarios do programa teñen a posibilidade de realizar prácticas formativas nas empresas do municipio boirense.
Por outra banda, tódalas persoas demandantes que participen no programa integrado de emprego terán dereito a percibir unha bolsa consistente en cinco euros por dia de asistencia ás accións. Os interesados poden solicitar toda a información do Boiro Emprega na Oficina de Orientación Laboral do Concello, de maneira presencial, no enderezo electrónico orientación.laboral@boiro.org ou no teléfono 981842609.