Na xornada de hoxe celébrase o Día Mundial da Diabetes e a Área Sanitaria de Santiago e Barbanza súmase a concienciación da importancia de previr, identificar e tratar esta doenza, pois, segundo precisan, ao redor do 13% da poboación adulta ten diabetes, aínda que a metade deles non o sabe.
O doutor Miguel Martínez Olmos, xefe do Servizo de Endocrinoloxía e Nutrición da área compostelá, indica que “unha das importantes tarefas que temos por diante é a identificación e diagnóstico deste 6’5% de persoas que non saben que teñen diabetes.” Do mesmo xeito, informa que “as accións do día mundial van encamiñas a un maior coñecemento de cales son os síntomas e factores de risco.” E aproveitou a xornada para concienciar da importancia de levar un estilo de vida saudable, “a través da alimentación e do exercicio físico de forma regular. Aínda que tamén hai unha predisposición xenética, levar uns bos hábitos de vida son fundamentais para a prevención.”
O Día Mundial da Diabetes foi instaurado pola Federación Internacional de Diabetes e a Organización Mundial da Saúde en 1991, en resposta ao preocupante aumento da diabetes no mundo. O seu propósito é dar a coñecer as causas, os síntomas, o tratamento e as complicacións asociadas a esta enfermidade, para así axudar a previr o seu enorme crecemento. Esta xornada reúne a millóns de persoas en máis de 160 países, incluíndo pacientes afectados pola diabetes, profesionais sanitarios, autoridades con poder de decisión en materia sanitaria e medios de comunicación.
Cada ano, as celebracións deste día viran ao redor dunha idea central, e neste 2019 o tema é a Diabetes e a Familia. O Servizo de Endocrinoloxía e Nutrición da Área Sanitaria de Santiago-Barbanza programou unha serie de actividades con obxecto de transmitir á poboación a relevancia desta enfermidade e as súas importantes repercusións na vida, non só do paciente, senón dos seus familiares.
En primeiro lugar establecéronse dous puntos informativos, un no patio da entrada do Hospital Clínico e outro no Hospital da Barbanza, atendidos por persoal médico e de enfermería de Endocrinoloxía e Nutrición. Aquí ofreceuse información sobre prevención e control de diabetes, hábitos de vida saudable, ou cálculo do risco individual de padecer diabetes, que estivo accesible para pacientes ambulatorios, familiares e tamén para persoal hospitalario.
Pola mesa instalada no Clínico pasaron uns 150 usuarios ao longo da mañá e preto de 100 pola do Hospital da Barbanza.
Aos pacientes hospitalizados con diabetes faráselles chegar durante o día información sobre como asegurar un bo control da súa patoloxía e evitar complicacións, a través dun díptico que se achegará na bandexa das comidas. Por último, tratarase de achegar a campaña informativa á poboación xeral fóra do hospital.
Por outra banda, o 23 de novembro, coa colaboración do Concello de Boiro, persoal do Servizo de Endocrinoloxía e Nutrición de Santiago, xunto coa enfermería voluntaria do Hospital da Barbanza e de Atención Primaria da área, levarán o punto informativo sobre Diabetes e a Familia ao local multiusos do mercado municipal de Boiro. Desta maneira, o Servizo de Endocrinoloxía e Nutrición de Santiago-Barbanza pretenderá, coa organización das actividades enmarcadas neste evento internacional, mellorar o coñecemento da poboación en diabetes como estratexia fundamental para combatela e controlala. Ademais, anímase a tódolos interesados, pacientes ou familiares, a que acudan aos puntos informativos e axuden a loitar contra a diabetes mellitus.
