A Asociación Amicos, colectivo barbanzán de familias de persoas con diversidades funcionais, autismo e parálise cerebral, vai organizar a segunda edición dunha das súas grandes citas a prol da plena inclusión: o Festiritititi, o festival da integración a través do xogo. A cita será a vindeira semana, o martes 3 de decembro, na praza do Concello de Boiro en horario de 1.00 a 13.30 horas.
O festival levarase a cabo no marco do Día Internacional das Persoas con Discapacidade, unha “xornada especial” para as e os integrantes de Amicos polo que ten de celebración de todas aquelas cousas que favorecen unha vida plena, sen barreiras e acorde co desenvolvemento das moitas capacidades de cada quen.
Á cita, informan dende Amicos, están convidados centros educativos, autoridades e familias de toda a nosa contorna, “porque o Festiritititi está integrado por actividades de lecer (xogos, obradoiros) para promover a inclusión a través do xogo”, sinalan dende a asociación, engadindo que o programa de accións dinamizadoras incluirá actividades con zancudos, pompeiros ou magos, entre outras.
A festa comezará ás 11:00h e as actividades desenvolveranse até as 13:30h. Ás 11:30 farase unha actividade especial para recibir ás autoridades.
Nesta edición está confirmada a presencia de máis de 400 escolares dos centros educativos da comarca, así como o director xeral de Maiores e Discapacidade Ildefonso de la Campa, a directora xeral de Xuventude Cristina Pichel e representantes dos concellos de Boiro, Ribeira e Pobra.
