Sara Michieletto, primeiro violín na Orquestra Sinfónica do Teatro La Fenice, de Venecia, vén de ofrecer un recital no Auditorio municipal de Ribeira ante máis de 200 estudantes de ensino secundario no municipio. Este concerto didáctico concibiuse co afán de acentuar a importancia da pedagoxía a través das emocións, así como resaltar a importancia do medio ambiente e a loita contra o cambio climático.
A este respecto, nun breve discurso en galego ao principio da sesión, a propia Micheletto aludiu ao dramatismo das imaxes da inundación acaecida a pasada noite na súa cidade de orixe, Venecia.
Para o recital contou coa participación dalgúns estudantes que a acompañaron no escenario do recinto municipal. O repertorio comprendeu algunha peza composta pola propia violinista e outras de grandes mestres coma Vivaldi.
A iniciativa organizouse en colaboración co profesorado do IES Número 1 de Ribeira e IES Leliadoura, aos que a concelleira de Cultura, María Sampedro, agradeceu a súa implicación.
