A plataforma Stop Desahucios Barbanza que coordina José Manuel Pena vén de recibir resposta da Valedora do Pobo, María Dolores Fernández Galiño, acerca dun escrito recente da organización da nosa comarca na que se lle poñía ao tanto da emerxencia na que viven múltiples familias da contorna por risco de desaloxo debido aos impagos do aluguer ou dos empréstimos hipotecarios. Na misiva, Stop Deshaucios lembráballe que a lacra dos desafiuzamentos provocou unha dramática situación de “emerxencia habitacional” que, lonxe de diminuír, está indo a máis. Na carta tamén se requiría o cumprimento do convenio de colaboración subscrito entre o Consello Xeral do Poder Judicial (CGPJ), a FEGAMP e a Xunta, destinado a recoñecer, blindar e asegurar o dereito á vivenda das familias.
Na resposta, a Valorada do Pobo recoñece, entre outras cuestións, que se observa un incremento significativo dende 2013 dos procedementos xudiciais por impagos das rendas de aluguer, e é por iso que se “considera necesario redobrar esforzos entre todas as partes asinantes do convenio a fin de que se poña a información e os recursos precisos a disposición das persoas afectadas por esta problemática”.
Amais, María Dolores Fernández sinala na súa resposta que “renovouse o acordo de colaboración asinado co IGVS da Xunta a fin de seguir actuando na problemática que supoñen os desafiuzamentos de vivendas habituais das persoas e familias en situación de vulnerabilidade”.