O pasado xoves conmemorouse o Día Mundial da Diabetes, instaurado pola Federación Internacional de Diabetes e a Organización Mundial da Saúde en 1991, en resposta ao preocupante aumento desta doenza no mundo. O seu propósito é dar a coñecer as causas, os síntomas, o tratamento e as complicacións asociadas a esta enfermidade, para así axudar a previr o seu enorme crecemento. Deste xeito, o Concello de Boiro organiza para o sábado 23 a I Xornada da Diabetes coa finalidade de informar e sensibilizar á cidadanía sobre esta doenza. Ao acto de presentación asistiron a concelleira de Política Social, Marisa Collazo; a doutora Rocío Villar, endócrina do Hospital do Barbanza; e a enfermeira Ermitas Treus.
A edil manifestou que as accións que compoñen esta iniciativa inclúen un punto de información e a realización de probas médicas por parte do equipo integrado pola doutora Rocío Villar e oito enfermeiras e enfermeiros. Marisa Collazo precisou que con esta xornada queren “trasladar toda a información posible, xa que lamentablemente a diabetes está catalogada como un epidemia do século XXI, e imos pretender que coa vontade destes profesionais axudemos a combatela e controlala.”
Na súa intervención, a doutora Rocío Villar apuntou que se sae ás rúas co dobre obxectivo de achegar á veciñanza os coñecementos para evitar a diabetes ou para tratar e controlala o mellor posible si xa se padece. Neste senso, a todas aquelas persoas que non padezan esta enfermidade facilitaráselle información de como eludila a través de estilos de vida saudables, ademais de efectuar probas de glucemia capilar e de tensión, os cales “son factores de risco moi asociados á diabetes.” Tamén se procederá á medición de cintura e ao cálculo do peso, a talla e o índice de masa corporal, “posto que a obesidade, que é a outra epidemia do século XXI, vai moi da man da diabetes.” Polo contrario, se a persoa xa ten esta doenza, indicaráselle como debe estar controlada, mirar o azucre e tensión, darlle recomendacións específicas para a súa patoloxía e para esquivar complicacións. A endócrina expresou que se trata dunha “enfermidade silenciosa, pero que produce moitas consecuencias e serias consecuencias.”
Así, persoal do Servizo de Endocrinoloxía e Nutrición de Santiago, xunto coa enfermería voluntaria do Hospital do Barbanza e de Atención Primaria, levarán o sábado 23 o punto informativo sobre Diabetes e a Familia ao local multiusos do mercado municipal de Boiro, en horario de 10.00 a 14.00 horas.
