A comunidade senegalesa celebrou en Ribeira a súa festa do Maoloud

Este 9 de novembro a comunidade senegalesa do mundo celebrou unha das súas grandes festividades: a conmemoración do Maoloud, que festexa o nacemento do Profeta Mouhamed (Mahoma) e que é un dos grandes acontecementos do calendario do devandito país africano (con importantes mobilizacións e peregrinacións a algunhas das principais mesquitas), un país que conta cunha importante representación nos nosos concellos.

Este sábado 9 de novembro, de feito, a Comunidade Senegalesa da Comarca do Barbanza reuniuse na carpa municipal de Ribeira para celebrar o nacemento do Profeta. No evento, segundo os responsábeis da Comunidade, reuníronse preto dun centenar de senegaleses e senegalesas residentes na nosa contorna.

A organización da celebración correu a cargo do devandito colectivo, e foi, nas súas palabras, “un auténtico acto de confraternidade” no que se recitaron parágrafos do Corán e cánticos propios de Senegal. Como se pode apreciar nas imaxes, boa parte dos asistentes acudiron vestidos con roupas tradicionais, “acordes ao acto de exaltación relixiosa”. Os festexos acompañáronse de gastronomía típica do país.