20191001 A semana cultural de Boiro vén desta volta con exposicións e humor. A vertente expositiva ten o seu epicentro no Centro Social de Cabo de Cruz, coa inauguración, o venres 4 de outubro ás 19.00 horas, da exposición de imaxes e vídeo submarino A Mirada do Peixe. A mostra, organizada polo Club Náutico de Cabo de Cruz, recolle as pezas audiovisuais dos actuais campións do mundo de vídeo submarino, Jorge Candán e Pilar Barros, e no relativo a fotografía, imaxes de José García e Jaime Solla, campións galegos de imaxes subacuáticas no 2019. A vertente dupla vén da man do humorista, actor e clown galego Pedro Brandariz, que desenvolve dous espectáculos.
O primeiro deles é Technologies, que se celebra o venres 4 de outubro ás 21.00 horas no Centro social de Escarabote. Será un monólogo cómico sobre a presenza (ou sobre-presenza) das novas tecnoloxías no noso día a día, facendo un percorrido pola súa historia recente (dende as antigas cintas de casete e VHS aos actuais dispositivos tecnolóxicos, pasando pola pegada deixada polo CD ou o DVD). Technologies é un espectáculo destinado a público adulto a partir de 12 anos.
Por último, Pedro Brandariz recuncará o sábado 5 de outubro, pero farao na Biblioteca Municipal de Boiro, onde ofrecerá á rapazada o espectáculo Non máis princesas, a partir das 12.00 horas. Trátase dun contacontos para nenas e nenos de entre 3 e 12 anos, cuxo obxectivo é “concienciar en igualdade de xénero e a prevención da violencia machista”. Está protagonizado por personaxes femininas que escapan dos estereotipos e os roles clásicos de xénero. Insírese no programa Ler conta moito.
