O espazo de usos múltiples municipal situado fronte ao mercado de Ribeira será escenario esta fin de semana da celebración do Samaín. Organizada polo Concello e a Asociación Alfaia, a cita conta cunha programación de balde que arrancará ás 18.00 horas do venres, 1 de novembro, co acto inaugural, momento que marcará o inicio das actividades destinadas, especialmente, aos cativos.
Así, a exposición de cabazas terá lugar o venres 1, en horario de 18.00 a 21.00 horas, ademais do sábado 2 e o domingo 3, de 12.00 a 21.00 horas. Na xornada do sábado 2, desde as 16.00 a 20.00 horas, tamén haberá obradoiros de maquillaxe; mentres que o domingo 3, en horario de 17.00 a 20.00 horas, será a quenda do baile de disfraces con premios segundo criterios de orixinalidade, composición ou creatividade, entre outros.
