A Consellería de Política Social quere que este Nadal non haxa persoas maiores que pasen as festas en soidade. Por esta razón, vén de lanzar a nova edición da iniciativa Xuntos polo Nadal, que ficará en activo nos nosos concellos entre o 23 de decembro e o 7 de xaneiro. Por exemplo no Concello de Rianxo, que sinala que se trata dun programa para acompañar ás persoas de máis de 60 anos que permanecen soas nestas festividades e cuxo prazo para presentar solicitudes estará aberto até o 15 novembro.
No caso rianxeiro, é posíbel facer a inscrición e solicitar máis datos sobre a iniciativa nos servizos sociais comunitarios do Concello, nos servizos sociais de atención primaria de saúde, nos centros sociocomunitarios dependentes da Consellería de Política Social e máis nas xefaturas territoriais da Consellería. Para máis información, tanto no que respecta a Rianxo como ao resto dos concellos de Barbanza, cómpre chamar ao teléfono social de balde 900 333 666.
Como dixemos, Xuntos polo Nadal é un programa de promoción do envellecemento activo e convivencia, destinado ás persoas maiores que se atopen soas nestas datas, xa sexa por carencia de familiares ou amigos, perda do seu cónxuxe ou por outras circunstancias. O programa levarase a cabo na Residencia de Tempo Libre de Panxón (Pontevedra) entre o día 23 de decembro de 2019 e o día 7 de xaneiro de 2020 e comprende os seguintes servizos: estadías na residencia durante 16 días (15 noites), aloxamento en habitacións compartidas e manutención en réxime de pensión completa, desprazamento en autobús desde Santiago até a residencia e actividades de animación sociocultural.