20191007. O BNG boirense levará a pleno a situación que, segundo apunta, se vén sucedendo nos últimos tempos nalgunhas partes da coñecida como rúa peonil, pois “veñen sendo ocupadas por vehículos que estacionan nela e a utilizan como atallo para evitar outras rúas transitables do noso Concello.”
Concretamente sinalan o tramo desta vía que decorre entre as rúas Fernández Mato e Dereitos Humanos debido ao “importante número de vehículos que diariamente se poden ver estacionados ocupando os lugares reservados para os peóns.”
Desde o Bloque entenden se trata dun asunto que é “preciso corrixir para que o mal uso que por parte dalgúns veciños se fai dun espazo público non se estenda a outros lugares do noso municipio.”
Por todo isto, solicitan a adopción de acordos que inclúe instar ao goberno municipal a que proceda “a adoptar as medidas precisas que contribúan a corrixir o mal uso que das rúas e espazos peonís do noso Concello se está a levar a cabo por algúns usuarios e usuarias de vehículos”, así como a colocación de sinais de identificación de existencia dunha vía de carácter peonil “tanto na colindancia desta coa rúa Dereitos Humanos como coa rúa Fernández Mato, con mención expresa á prohibición de estacionamento e/ou parada na mesma.”