20191011. Despois do acontecido a principios do mes de outubro cando o goberno municipal pobrense convocou un pleno urxente e extraordinario -entre cuxos puntos do día figuraba a aprobación da dedicación exclusiva da Concellería de Servizos Sociais, Servizos Munucipiais e Benestar Animal, así como a contratación de persoal de secretaría de Alcaldía-, o BNG volveu pronunciarse hoxe en relación a que non hai negociación para participar no goberno municipal, sinalando que a prioridade da formación é “restituír a democracia no noso Concello. E digo restituír porque esta foi usurpada polo goberno de Nós Pobra e do PSOE, xa que utilizaron unha falsa maioría en beneficio propio. Puxeron por diante das institucións os seus soldos e os seus postos”, tal e como apuntou Amparo Cerecedo.
Tamén engadiu que “isto non é para facilitar a gobernabilidade, isto chámase desde sempre caciquismo.” Desta maneira, os nacionalistas insisten en que o goberno local convoque coa mesma urxencia un pleno extraordinario onde revoquen os seus acordos.
Así mesmo, Amparo Cerecedo afirmou que ao día seguinte da convocatoria da sesión plenaria urxente e extraordinaria do 1 de outubro houbo unha chamada persoal ao seu teléfono “supoño que como futura voceira municipal” co obxectivo de reunirse co alcalde. Segundo indica Cerecedo, nesa xuntanza “inténtase convencer da necesidade dese posto de persoal eventual e, ao mesmo tempo, nós tamén insistimos no que sempre levamos dicindo: o BNG non estaba de acordo coa necesidade de ter ese perfil de persoal eventual”, se ben aceptan que existise esta figura “sempre e cando fora de consenso.” Do mesmo xeito, os nacionalistas trasladaron que había un antes e un despois do pleno.
Finalmente, Amparo Cerecedo insistiu en que, para haxa intercambio de opinión nun primeiro momento, “é necesario que se revoque ese pleno.”
