Os Bar Ban Sónicos, a banda de rock da Pobra do Caramiñal, están a presentar estes días as súas primeiras gravacións dende a Rede, en formato de libre descarga ou ben para escoitar en streaming. Trátase de Demo 2019, integrado por catro contundentes temas en galego (Vén con nós, Trece anos, Xa non pode parar e Sentirme ben), moi enérxicos e envolventes en con claras raizames na música garaxe sesenteira, no punk e no rythm & blues máis guitarreiro e noctámbulo.
A demo foi gravada nos estudos ALU de Rianxo por Rafa Iglesias. Para celebrar o lanzamento, a banda lanzouse a unha xira pola nosa terra, os días pasados en Santiago (na Gentalha do Pichel) e esta finde en Boiro (Leña Verde, ás 22.00 horas do sábado 2 de novembro). A presentación das ditas cancións vén acompañada de vídeos das actuacións e fotografías que podemos ver no seu Facebook.
Traxectoria
Segundo nos lembran dende o seu espazo web bandcamp, Os Bar Ban Sónicos fórmanse na Pobra a principios do ano 2018, con Manel Casal na voz e guitarra, Amroth no baixo e coros e Abel Cores na batería. Nos seus inicios o seu repertorio estaba formado por clásicos do garaxe dos 60 e o punk rock. Os seus concertos, como ben saben os que tiveron a sorte de escoitalos, van un paso máis alá na súa proposta de ir ao miolo da cuestión rockeira, sen reviravoltas, e facer vibrar (e bourar) todo aquilo que se poña ao seu alcance sonoro: son, nas súas palabras, “concertos enérxicos e contundentes con poucas concesións ao virtuosismo a ao onanismo instrumental”…
