20191003 Rianxo quere seguir sendo un referente en remodelación e posta en valor do patrimonio arquitectónico e urbanístico. Se recentemente falamos do mantemento da Area de Rehabilitación Integral (que pon en xogo importantes incentivos para seguir apostando por recuperar casas dos diferentes núcleos antigos rianxeiros) e da reactivación das Casas dos Mestres, agora é a quenda de dar conta do sexto Foro de Rehabilitación de Rianxo, que se celebra os días 4, 5, 6 e 26 de outubro, da man do Concello e un conxunto de empresas referentes no sector da “re-construción” e a posta en valor de predios.
A cita será no Auditorio local e contará coa presenza de sobranceiros expertos galego-portugueses en materia de recuperación dos cascos vellos das nosas vilas e cidades. Por exemplo: Eduardo Souto de Moura, Guilherme Machado Vaz, José Aguiar, Fernando Cerqueira Barros, Iago Seara, Manuel Seoane Feijóo, Cendón – Vázquez, Santiago Martínez ou Guillermo Rodríguez. Quen precise máis datos sobre o foro, pode consultalos xa na páxina web habilitada: concelloderianxo.gal/vi-foro-rehabilitacion.
As actividades darán comezo este venres 4 ás 17.00 horas, coa presentación do evento e coa conferencia Experiencias de rehabilitación en Vigo, a cargo de Cendón-Vázquez Arquitectos. De seguido, será a quenda de Fernando Cerqueira (Un ollar sobre as arquitecturas tradicionais nas montañas galego-portuguesas) e de Parteluz Restauración e Crea Restauración (A recuperación de pinturas murais da igrexa do Mosteiro de San Xiao de Moraime e do Papa Pío).
