20191008. O deputado responsable da área de Promoción Económica, Blas García, visitou esta mañá o parque comarcal de bombeiros de Boiro, un dos dez que xestiona na provincia da Coruña o Consorcio Provincial Contraincendios. Esta entidade está integrada ao 50% pola Deputación e a Xunta de Galicia, sendo presidida polo titular da institución provincial coruñesa, Valentín González Formoso.
Acompañado do rexedor de Boiro, José Ramón Romero; do tenente alcalde, José Luis Ruíz; e do xerente do Consorcio, Luis Barca; o deputado conversou cos bombeiros e coñeceu as instalacións, equipamentos e funcionamento. Este parque presta os seus servizos desde hai 15 anos -xunto co de Ribeira- a máis de 102.500 habitantes nos concellos de Boiro, A Pobra do Caramiñal, Rianxo, Ribeira, Porto do Son, Noia, Lousame, Outes e Dodro. Deste xeito, a súa área de intervención conta cunha extensión de máis de 600 quilómetros.
Blas García afirmou que esta primeira visita enmárcase nunha rolda que realizará polos dez parques comarcais de bombeiros da provincia da Coruña “para coñecer de primeira man o funcionamento e necesidades” do servizo de emerxencias.
O deputado agradeceu o “bo traballo” e a “profesionalidade” das 18 persoas que desenvolven o seu labor no parque boirense (1 sarxento, cinco cabos e doce bombeiros), xunto coas 12 de Ribeira, para atender as emerxencias, accidentes e incendios que se produzan nos nove concellos que forman parte da súa área de intervención, sostendo que o Consorcio segue avanzando nos trámites necesarios para implantar a xestión directa do servizo a partir do 1 de xaneiro de 2020. Neste senso, manifestou que “entendemos que un servizo tan importante e sensible coma o das emerxencias debe ser 100% público e xestionado directamente pola administración, por iso apostamos por este cambio de modelo, que suporá ademais un aforro anual de 1 millón de euros para o erario público”, precisando que nas vindeiras semanas se celebrarán xuntanzas cos representantes dos traballadores para abordar a equiparación salarial dos mesmos.
Ademais, antes de proceder á visita do parque de bombeiros, Blas García reuniuse no Concello de Boiro co alcalde da localidade, José Ramón Romero, quen solicitou a colaboración da área de Promoción Económica da institución provincial para potenciar a actividade da Asociación Boirense de Empresarios e da Confraría de Pescadores, a cal precisa melloras no edificio da lonxa de Cabo de Cruz.
