Novo equipamento para mellorar a atención en emerxencias na Pobra

20191009 O Goberno galego vén de entregar novo equipamento para optimizar o servizo de atención en emerxencias das Agrupacións de Voluntarios de Protección Civil nunha ducia de concellos da provincia da Coruña, entre os que se atopa o de Pobra do Caramiñal. O fornecemento do novo material levouse a cabo en Vedra, hoxe, contando coa presenza do director xeral de Emerxencias, Santiago Villanueva, e o delegado territorial da Xunta na Coruña, Ovidio Rodeiro. Na cita entregáronse hoxe cinco vehículos pick-up e sete remolques.

Desta volta, os municipios de Cedeira, Carnota, Zas, Carral e Vedra recibiron cadanseu vehículo pick-up, mentres que a Ames, A Pobra do Caramiñal, Cee, Culleredo, Lousame, Oroso e Paderne foilles entregado un remolque equipado con material de emerxencias: un elemento de carga que dispón de electrobomba mergullábel, unha motobomba para augas residuais, xeradores de electricidade portátil, motoserra, rozadora, torre de iluminación e kit de balizamento e sinalización.

Segundo fixeron saber os representantes da Xunta, a entrega de hoxe dá continuidade á folla de ruta iniciada para mellorar a calidade de resposta e a seguridade nas actuacións de prevención de riscos e nas intervencións en emerxencias en calquera punto da Comunidade galega mediante a dotación de máis material e equipamento ás Agrupacións de Voluntarios de Protección Civil e aos Grupos de Emerxencia Supramunicipal (GES).