20191015. O alcalde de Boiro, José Ramón Romero, reuniuse na tarde de onte co conselleiro de Economía, Emprego e Industria, Francisco Conde, co obxectivo de abordar novas vías de colaboración entre o Concello e a Xunta para a dinamización económica do municipio.
Ambos revisaron tódalas axudas que a Consellería de Economía, Emprego e Industria concede aos concellos e, en particular, ao de Boiro. Así, examinaron as actuacións máis recentes que se están realizando no municipio coma a ampliación do sistema de vixilancia con cámaras de seguridade e a mellora da vía da fase II do polígono, na cal se está a traballar.
O rexedor aproveitou para transmitirlle ao conselleiro unha preocupación dos empresarios do polígono industrial de Espiñeira relativa á seguridade do mesmo. Coa pretensión de solucionala, acordouse realizar un peche perimetral de seguridade ante incendios bordeando a área industrial por detrás das naves. Unha medida para a que se van buscar as axudas e a financiación precisas, segundo manifestan.
Ademais, na xuntanza tratáronse as iniciativas que se están a desenvolver no eido da formación para o emprego, a dinamización comercial ou a dixitalización do comercio de proximidade, entre outras cuestións.
En total, a Consellería de Economía, Emprego e Industria destinou este ano ao concello de Boiro máis de 900.000 euros.