20191022 Boiro vai acoller este mes de outubro unha actividade de formación directamente encamiñada a empoderar á poboación feminina en materia dixital: favorecer que teñan nas súas mans os mellores recursos posíbeis para dominar os diferentes servizos de banca en liña ou de comercio electrónico, agora que os dous ámbitos de actividade avanzan na súa convivencia cos métodos tradicionais (os servizos bancarios en sucursal ou os pagos con diñeiro físico).
A actividade, que este mércores 23 ten a súa primeira sesión, vén da man da Unión de Consumidores de Galicia (UCGAL) en colaboración coa Secretaría Xeral de Igualdade. Os obradoiros insírese no programa Escola para o apoderamento de mulleres no rural, que achega formación nunha manchea de concellos galegos.
As sesións de Boiro (un total de 8 horas) levaranse a cabo nas seguintes datas: mércores 23, xoves 24, mércores 30 e xoves 31 de outubro; en horario de 17:30 a 19:30 horas na aula CeMIT local (Centro Social de Boiro. Rúa Poeta Manuel María, s/n).
A Escola para o apoderamento de mulleres do rural: comercio e banca electrónica é unha aposta pola formación en novas tecnoloxías co fin de diminuír a fenda dixital, fomentar o apoderamento financeiro e a autonomía económica nun contexto, sinala UCGAL, “no que o número de oficinas bancarias diminúe de maneira progresiva e no que as transaccións de bens e servizos a través da Rede están á orde do día”.
Entre os obxectivos deste obradoiro de formación están os seguintes: que as asistentes adquiran coñecementos e habilidades relacionadas coa Sociedade da Información (banca electrónica, comercio electrónico) e, así mesmo, coñezan os seus dereitos como persoas consumidoras e as ferramentas existentes que permiten o exercicio dos mesmos.
