20191011. O Concello de Boiro vén de acondicionar en Espiñeira un espazo para o estacionamento de vehículos. Unha medida coa que, segundo apuntan, pretenden atallar o problema da falta de zonas de aparcamento tamén no polígono industrial. Á inauguración desta área asistiron o alcalde José Ramón Romero; o concelleiro de Urbanismo, José Luís Ruiz; e a directora do IES Espiñeira, Mariana Domínguez.
O edil José Luís Ruiz expresou o seu agradecemento á comunidade de montes pola cesión deste terreo que “xa se viña empregando para o estacionamento de vehículos pero era insuficiente, agora a superficie é maior e da un mellor servizo tanto aos usuarios do instituto como a particulares.”
Pola súa parte, a directora do citado centro, Mariana Domínguez, falou das comodidades que supón este novo espazo, tanto para o alumnado do instituto que asiste no seu propio coche coma para os pais que deixan aos rapaces, pois nas horas de entrada e saída concéntranse numerosos vehículos.
Na súa intervención, o rexedor José Ramón Romero destacou a importancia desta intervención, xa que “aquí poden estacionar tanto os alumnos que veñen á clase no seu propio coche ou pais que traen aos rapaces. Ademais, ao estar ao lado da entrada da autovía, funciona tamén como punto de encontro para aquelas persoas que comparten coche para ir a traballar.”
