A axenda cultural do Concello de Boiro xirará arredor do coñecemento (temas de actualidade, temas tecnolóxicos) e de como intercambialo da mellor maneira posíbel, libremente e sen cancelas. Serán dúas sesións para dialogar, participar e poñernos ao día. A primeira cita terá lugar este 31 de outubro ás 18.00 horas na Biblioteca Municipal de Boiro. Trátase dunha nova edición dos Faladoiros da Biblioteca. A segunda cita é un obradoiro tecnolóxico na aula CeMIT local.
Polo que respecta aos faladoiros son un ciclo de encontros que poñen o foco na mocidade e que inclúen o desenvolvemento de microdebates arredor de todo tipo de cuestións actuais (sociais, culturais, políticas, medio ambientais, educativas, tecnolóxicas, sexuais, etc). O faladoiro deste xoves, igual que as sesións previas, vai destinado a rapazas e rapaces de idades comprendidas entre os 11 e os 16 anos. Para participar, é preciso que se inscriba de xeito presencial na Casa da Cultura ou ben no teléfono 981 84 84 10.
No que se refire ao Obradoiro de Banca Electrónica, celébrase entre este mércores 30 e o xoves 31 de outubro, en horario de 16.30 a 19.30 horas. Trátase dunha actividade formativa de banca electrónica para mulleres do rural que organiza a Unión de Consumidores de Galicia a través da Escola para o apoderamento de mulleres no rural: comercio e banca electrónica, unha aposta pola formación en novas tecnoloxías dirixida a facer diminuír a fenda dixital, fomentar o apoderamento financeiro e a autonomía económica nun contexto.
Entre os obxectivos deste obradoiro de formación están os seguintes: que as asistentes adquiran coñecementos e habilidades relacionadas coa Sociedade da Información (banca electrónica, comercio electrónico) e, así mesmo, coñezan os seus dereitos como persoas consumidoras e as ferramentas existentes que permiten o exercicio dos mesmos.
