20191022 Este xoves 24 de outubro vaise celebrar nos nosos espazos de lectura municipais o Día da Biblioteca, que se conmemora a nivel galego e estatal dende hai máis de dúas décadas (dende que a Asociación Amigos do Libro Infantil e Xuvenil decidiu propoñer esta xornada para destacar as vantaxes de termos acceso local aos libros e á cultura). As nosas bibliotecas están a preparar diversas actividades para festexar a xornada. Por exemplo a de Boiro, que ten programada unha actividade cun dos grandes autores da nosa comarca, Antón Riveiro Coello, limiao afincado na localidade dende hai unha chea de anos. O novelista compartirá achados, lecturas, proxectos e vivencias coas usuarias e usuarios da biblioteca local (Casa da Cultura) a partir das 18.30 horas.
O fío temático principal da súa intervención será a novela curta A ferida do vento, que narra en clave de semi-ficción (nela, a liña que separa o biográfico do inventando preséntase fina e complexa de albiscar) a primeira mocidade en Xinzo de Limia do autor. A novela, ademais, é un emotivo tributo ás xentes de Xinzo e a súa contorna, boa parte dela tocada polo vento que corre libre pola chaira de Antela, xentes que acompañaron a súa nenez e a súa mocidade e entre as que se inclúe outro novelista referencial das nosas letras, Carlos Casares, que na novela de Riveiro Coello figura como un personaxe máis.
O Día da Biblioteca está especialmente adicado ao público infantil e xuvenil. A proposta desta celebración veu da man da dita asociación, en recordo da destrución na Biblioteca de Saraxevo en 1992, e foi apoiada no seu día polo Ministerio de Cultura. Esta conmemoración naceu para “trasladar á opinión pública a importancia da biblioteca como lugar de encontro dos lectores de todas as idades coa cultura, e como un instrumento de mellora da formación e a convivencia humana”. A xornada celébrase a nivel galego e estatal e acompáñase dun pregón que se difunde en todas as bibliotecas de España.