20191022. Case unha trintena de veciños de Boiro dispoñen xa nas súas casas dun composteiro para a materia orgánica, pois o Concello está adherido ao programa de compostaxe doméstica promovido por SOGAMA, cuxo obxectivo reside en estender as prácticas de autocompostaxe nas vivendas do municipio para lograr unha xestión máis sostible do lixo.
Dito programa é unha experiencia piloto que comeza este ano con composteiros nunhas trinta vivendas unifamiliares dos núcleos de Abanqueiro e Cespón, impulsando así esta práctica nos fogares.
O Centro Social de Abanqueiro acolleu na tarde de onte a entrega dos composteiros. Ao acto asistiron o alcalde José Ramón Romero, a concelleira de Medio Ambiente, Marisa Collazo, técnicos desta área no Concello e representantes de SOGAMA. Ademais, impartiuse formación inicial sobre o modo de emprego e a importancia de reducir os residuos orgánicos no contedor xenérico.
Na actualidade, o municipio boirense xera ao redor das 6.908 toneladas anuais de residuos que van ao contedor xenérico, constituíndo a materia orgánica o 40%. Así, coa autocompostaxe preténdese reducir a cantidade depositada na bolsa do lixo.
