20191014. O I Ciclo Victoriano García Martí deu comezo na tarde do venres 11 cunha ofrenda floral fronte ao busto deste escritor pobrense, así como unha lectura pública de fragmentos dun dos seus escritos. A continuación, procedeuse á inauguración no Museo Valle-Inclán dunha exposición composta por mostras bibliográficas, correspondencia, escritos persoais e fotografías, entre outros.
Na xornada do sábado 12 tivo lugar a presentación do libro inédito de Carlos García Bayón: Paseos por Don Victoriano García Martí. No acto interviñeron Patricia Lojo, concelleira de Cultura na Pobra; Valentín García, secretario xeral de Política Lingüística; Xesús Laíño, da Asociación Cultural Barbantia; e Ana García, filla de Carlos García Bayón. Ademais, os asistentes foron agasallados cun exemplar da obra.
O ciclo continuará esta fin de semana coas conferencias Victoriano García Martí. Pensador europeísta e sucesor do Rexurdimento, a cargo de Arantxa Fuentes Ríos, doutora europea en Teoría da Literatura e Literatura Comparada; e García Martí e a súa relación co feminismo, da man de Encarna Otero Cepeda, historiadora e escritora. Así mesmo, levarase a escena a obra de teatro Don Severo Carballo. Del alma gallega cun elenco artístico composto por Natalia Otero e Carlos Da Silva, escola de baile e pandeireta Caramiñas, Bradomín Teatro, Os Caraveiros, Tanxedoria e Lumieira.