20191015. O espectáculo Invisibles, a cargo de Redrum Teatro, chega á Casa da Cultura de Boiro o venres 18, ás 21.00 horas, dirixido a un público maior de 12 anos. Baseado no libro do mesmo nome de Montse Fajardo, presenta sete testemuños reais de maltrato a través de tres voces femininas. Tres xeracións de mulleres que amosan que non hai un perfil concreto de vítima de violencia machista. Así, o obxectivo deste espectáculo é concienciar e sensibilizar aos espectadores sobre unha lacra que afecta a toda a sociedade, facéndoa ben visible para poder eliminala.
O elenco está formado polas actrices Sheyla Fariña, Mela Casal e Nieves Rodríguez, baixo a dirección de Marián Bañobre.
Esta peza teatral trátase dunha coprodución entre Redrum Teatro, a Concellería de Igualdade do Concello de Pontevedra, o Centro Dramático Galego e a Deputación da Coruña.
Ademais, conta con varias distincións coma os galardóns a Mellor Adaptación, Mellor Dirección e Mellor Iluminación dos Premios de Teatro María Casares; así como o Premio Luísa Villalta a Proxectos de Igualdade concedido pola Deputación da Coruña.
