20191015. A Asociación Boirense de Empresarios (ABE) vén de presentar formalmente a súa adhesión á Rede de Comercios e Mercados no Camiño, xurdida ao abeiro do Xacobeo 2021. Esta iniciativa pretende potenciar as ventas do comercio de proximidade nos 138 concellos polos que transcorre o Camiño de Santiago, sendo Boiro un destes municipios.
O colectivo empresarial manifesta que optou pola vía de integración total dos seus comerciantes, polo que tódolos establecementos asociados que cumpran as características que determina a orde forman parte desta medida impulsada pola Xunta de Galicia.
Inicialmente, pola adhesión á Rede, os establecementos da ABE recibirán un paquete de benvida con diversos elementos promocionais para os seus clientes e un distintivo identificativo para o local. Tamén disporán da posibilidade de obter apoios para a edición personalizada de selos para as credenciais dos peregrinos.
Así mesmo, poden participar nas medidas de fomento que se levarán a cabo en forma de subvencións, mediante convenio con entidades colaboradoras, accións directas desde a Xunta de Galicia ou calquera outra modalidade adecuada para a súa execución.