20190905. Os partidos finais da Copa de Fútbol de Veteranos organizada polo Departamento de Deportes do Concello de Boiro disputaranse o sábado 7. A final do torneo será no Campo de Fútbol de Vista Alegre, ás 19.00 horas, entre Os Fornos e Muebles Guadalupe. Ademais, daranse a coñecer o terceiro e cuarto posto entre o Kirs e Interatlántico, ás 17.00 horas. Ao remate da xornada, sobre as 21.00 horas, está prevista a entrega de trofeos, á cal asistirá o concelleiro de Deportes, Marcos Fajardo.
Esta cita é xa unha tradición en Boiro, pois lévase celebrando varios anos. Nesta ocasión, foron seis os equipos de veteranos que participaron -Os Fornos, Tourline Express, Kirs, Interatlántico, Muebles Guadalupe e KN Decoraciones Esteiro-, todos eles de Boiro excepto o Interatlántico, que participa como convidado porque, a pesar de ser boirenses, xogan en Rianxo.
Os partidos desta convocatoria comezaron a fin de semana do 17 e 18 de agosto e as semifinais do torneo celebráronse o día 24.
