20190904. Por terceiro ano consecutivo celebrarase na vila rianxeira o Tríatlon Concello de Rianxo que citará o sábado 7 a preto de 100 participantes no porto ás 16.00 horas. No acto de presentación estiveron o alcalde Adolfo Muíños e o director executivo da proba, Miguel Fernández.
O rexedor destacou a importancia do tríatlon no municipio, pois incluso contan cun club que desenvolve esta actividade polo que “o natural é que, dentro do calendario de probas deportivas do noso concello, pois apostemos polo tríatlon.” Así mesmo, engadiu que permitirá “facer do noso concello un lugar saudable no deportivo, pero tamén visitable no turístico e cultural”, fomentando ao mesmo tempo esta modalidade. Ademais, anunciou que haberá un dispositivo de seguridade, o cal implicará restricións de tráfico entre as 15.00 e 18.00 horas “garantindo a integridade dos participantes e da xente que imos contemplar esta actividade” e respectando as indicacións da Policía Local.
Pola súa parte, Miguel Fernández detallou as características desta convocatoria. Deste xeito, consta de natación cun percorrido de 350 metros, ciclista de 2 quilómetros dividida en catro voltas e 5 quilómetros de carreira a pé en tres voltas.
Ao finalizar procederase á entrega de trofeos e entre os favoritos sitúanse Xacobo de Crego, na categoría masculina, e María Lois, na feminina.
