20190918 JEALSA, a conserveira con sede en Boiro, vén de obter este mes de setembro un importante recoñecemento ao seu labor recente en materia de deseño, mercadotecnia (marketing) e presentación dos seus produtos de Rianxeira no mundo. A distinción foille concedida o pasado 12 de setembro, na celebración en Londres da 13º edición dos premios Pentawards, o certame de meirande prestixio internacional do ámbito do packaging, e que dende 2007 foi quen de xuntar máis de 16.000 participantes de 64 países. No evento, JEALSA obtivo o Pentaward de Prata polo lanzamento da nova imaxe de Rianxeira, este 2019, que inclúe nova feitura, redeseño integral e innovadores envases.
A marca de Boiro lembra que o Pentaward de Prata é un dos galardóns de maior prestixio a nivel global neste ámbito da creatividade ligada aos envases e á paquetería. “Este premio”, engade a empresa, “súmase aos esforzos da marca e de JEALSA por presentar unha proposta única e innovadora de produtos, onde a sustentabilidade e a transparencia son o seu ADN e a súa principal baza para conquistar o mercado”.
Quen queira coñecer os novos deseños de packs de Rianxeira pode facelo a través da remodelada páxina web da conserveira, www.jealsa.com.
