20190917. O BNG insta á sociedade galega a saír á rúa para manifestar a súa repulsa ao triplo feminicidio de Valga secundando as mobilizacións convocadas para este mércores.
O responsable comarcal, Luís Pérez Barral, lanzou un chamamento “a favor dunha mobilización masiva para manifestar de xeito colectivo e como sociedade a repulsa e o rexeitamento a todas as formas de violencias machistas, sexan dentro do ámbito da parella ou fora del.”
Igualmente, a formación nacionalista denunciou que “urxe amosar o noso rexeitamento ás forzas políticas que practican ese discurso, -en referencia a ultra dereita de VOX-, pero tamén á aquelas outras forzas que lles abren as portas das institucións a través de pactos de goberno, a quen nega que as mulleres asasínanas constantemente, día a día, como traxicamente volvemos constatar onte en Valga, só polo feito de seren mulleres.”
O Bloque cualifica tamén de “ilóxico” o feito de que haxa circunstancias nas que a vítima non sexa considerada un caso de violencia machista como sucede, por exemplo, no crime rexistrado en Valga. Neste senso, salienta que “a Lei Galega contra a violencia de xénero de 2007, impulsada polo Bloque desde o Goberno da Xunta, vai máis aló da normativa estatal e establece que as vítimas deste triplo asasinato son todas atribuíbles á violencia de xénero.”
