20190905 O vento do nordés bate con forza estes días e, polos condicionantes que se suman aos fortes refachos de ar (tempo seco, eucaliptos a esgalla, presenza reiterada de pirómanos), o lume desátase nos nosos montes, especialmente castigados polos incendios en das recentes (aínda temos ben presentes nas memoria os lumes do pasado mes de marzo en Dodro, Rianxo e Boiro). Hoxe temos que lamentar, novamente, a presenza do lume en Porto do Son, Noia e máis en Boiro.
O máis preocupante de todos os focos (estímase que sete, algúns deles xa sufocados) é sen dúbida o de Porto de Son, que afecta principalmente á parroquia de Miñortos e que avanza a tal hora cara a outras contornas do municipio. Hoxe pola tarde a Consellería de Medio Rural estimaba en 80 hectáreas as calcinadas até o de agora. O lume aínda non estaba controlado a primeira hora da tarde de hoxe, malia a presenza activa de dous avións anfibios de gran capacidade da base de Santiago e outros dous procedentes de Salamanca, entre outros efectivos humanos e técnicos.
O incendio do Son comezou esta madrugada e, en poucas horas e grazas ao forte nordés, cubriu amplas franxas de territorio. No lugar traballan 9 axentes, 18 brigadas, 13 motobombas, 2 pas, 4 helicópteros e 5 avións. Tamén participan efectivos da Unidade Militar de Emerxencias (UME). A intención dos efectivos é sufocalo antes da chegada da noite, porque logo do solpor os efectivos aéreos teñen que interromper o seu traballo.
Amais do foco descontrolado de Miñortos, dende a pasada madrugada afectaron á comarca outros seis focos máis, todos eles de menor envergadura, centrados en Boiro e en Noia principalmente. Neste último concello destacou o lume de Boa (onde traballaban dúas brigadas, unha motobomba, un helicóptero e mailo grupo de emerxencias local) e o de Argalo. En Boiro salientaron os lumes de Cures, que, segundo as máis recentes informacións da Consellería, xa están baixo control (logo do traballo de dous axentes, tres brigadas, catro motobombas e o grupo local de emerxencias).