20190909 O CEIP Santa Marta do Castro, en Boiro, é un dos centros educativos de Primaria (até dúas ducias de centros) que van participar este curso nun proxecto autonómico de compostaxe que, segundo a entidade impulsora (Consellería de Medio Ambiente), é pioneiro e divulgativo. O cole de Boiro foi elixido para esta iniciativa por cumprir unha serie de importantes requirimentos, entre os que se contaba o feito de dispor de servizo de comedor escolar, contar cun espazo verde de seu para instalar de xeito indicado o composteiro ou ter un horto de seu.
O centro boirense, xunto cos outros 24 participantes, recibirá os medios materiais precisos para a instalación dun recanto para facer compost, así como a formación requirida para a súa posta en marcha e seguimento.
A dita formación, que chegará ao persoal de cociña e ao profesorado, dotaraos con coñecementos precisos para “dirixir e supervisar as actividades a desenvolver durante o primeiro trimestre do vindeiro curso”. O proxecto incluirá a realización de obradoiros sobre como aproveitar de maneira ecolóxica o lixo orgánico, así como a entrega dunha unidade didáctica sobre esta mesma temática.
