20190904 rematou en Corrubedo cunha gran celebración en todo o senso do termo “gran”: porque foi un xantar colectivo no que participaron máis de 300 comensais, na explanada do porto, e porque o que se conmemoraba (con música, confraternidade e unha paella que case non collía nos obxectivos das cámaras) era, nada máis e nada menos, que os once séculos de historia da vila mariñeira. Ademais dos devanditos ingredientes, houbo outro elemento extra que fixo do xantar unha cita especialmente memorábel: a presentación dun vídeo de 15 minutos e 34 segundos que recolle, plasma e inmortaliza a identidade de Corrubedo.
O audiovisual, presentado no encontro festivo nunha gran pantalla, é co-responsabilidade do historiador e escritor Francisco Sánchez Fraga, quen estivo no xantar dos once séculos e, tamén, nos actos previos de celebración da longa historia de Corrubedo, tal e como sinalamos dende O Barbanza, informando entre outras cousas da súa conferencia na Casa do Mar sobre a estreita relación da vila co mar, sobre os importantes vestixios arqueolóxicos locais ou sobre o documento no que se fai referencia á doazón da parroquia polo rei Ordoño II ao mosteiro de San Paio de Antealtares no ano 919 (documento que está a motivar a conmemoración destes once séculos).
Francisco Sánchez Fraga, que presentou o seu vídeo no xantar, referiuse á peza audiovisual como unha tentativa de plasmar en imaxes e son “a alma de Corrubedo”. O vídeo, tal e como nos lembran dende o blog do Bar Pequeño, está na Rede para quen queira desfrutalo, na web persoal de Max Franco, que integrou, xunto con Daniel Franco, Montserrat Gutiérrez e o propio Sánchez Fraga, o equipo responsábel da creación do vídeo. Co grupo tamén colaborou Fernando Vilariño, facendo as contribucións fotográficas.
