20190917. Ao longo desta semana, o municipio boirense será un fervedoiro de actividades destinadas a adultos e pequenos, facendo fincapé no eido cultural a través da lectura e de talleres, pero tamén centrándose na saúde.
O salón de actos do centro social de Boiro acollerá, en horario de 19.00 a 20.30 horas, dúas charlas. Hoxe, martes 17, terá lugar Como intervir ante un trastorno de conducta?, impartida por Iria Veiga, psiquiatra no Hospital do Barbanza. O segundo coloquio celebrarase mañá, mércores 18, baixo o título Os beneficios da intervención non farmacolóxica. As terapias de estimulación, a cargo de Noelia Riaño, directora do Centro de Día de Ribeira.
Tamén mañá, mércores 18, se desenvolverá o contacontos con Pedro Brandariz dirixida a cativos con idades comprendidas entre os 4 e os 10 anos. Esta actividade, que pertence ao programa Ler conta moito, será na Biblioteca municipal, situada na Casa da Cultura, ás 18.00 horas.
Por outra banda, o centro social de Escarabote albergará o xoves 19, ás 19.00 horas, o espectáculo teatral e obradoiro de cociña titulado A cabaza encantada, baixo a batuta do cociñeiro Antón e a pasteleira Tomasa. Esta cita oriéntase aos pequenos da casa de entre 4 e 8 anos, enmarcada dentro do programa Ler conta moito.
Xa de cara á fin de semana, o venres 20 realizaranse dúas accións. En primeiro lugar, a Bibloteca municipal converterase nun espazo de creación con motivo do obradoiro de ilustración impartido por Anxo Fariña a nenas e nenos de 6 a 11 anos. Esta cita conta cun aforo limitado a 25 prazas e adscríbese ao programa Ler conta moito. En segundo lugar, ás 20.00 horas, no centro social boirense procederase á presentación do curso 2019-2020 da Escola de Música de Boiro.
Finalmente, o sábado 21, Brais das Hortas achegarase ata a Biblioteca municipal, ás 12.00 horas, para exercer como contacontos para as crianzas maiores de 5 anos. Esta cita encádrase no programa Ler conta moito.
