20190821. O domingo 25 celebrarase na Pobra do Caramiñal a décimo primeira edición da Carreira Popular deste concello, a cal será ao mesmo tempo a primeira proba do Circuíto de Carreiras Populares Arousa Norte 2019, pertencendo ao VII Circuíto Provincial de Carreiras Populares da Deputación da Coruña. Os encargados de presentar esta cita foron o alcalde pobrense, Xosé Lois Piñeiro; Ana Romero, en representación da área de Deportes; e José Moure Muñiz, presidente da Asociación de Atletismo e Deportes do Barbanza.
As probas poderán disputalas tanto atletas federados en atletismo coma non federados e estarán baixo o control técnico do Comité de Xuíces da Federación Galega de Atletismo.
Este evento deportivo dará comezo ás 11.00 horas e as categorías de competición irán desde a Chupete ata Master 4. As inscricións realizaranse online a través da páxina web www.emesports.es, cun custe de 6 euros para adultos e de balde para escolares. O prazo remata mañá xoves, ás 14.00 horas, agardando acadar unha participación de en torno a 700 persoas. Todos aqueles atletas anotados no Circuíto Arousa Norte 2019 non terán que formalizar a inscrición nesta proba.
Á entrega de premios procederase ao redor das 13.30 horas.
José Moure sinalou que entre as novidades deste ano figuran que as categorías Sub 12 e Sub 14 sairán conxuntamente coa carreira principal, a incorporación da Zapatilla Inclusiva e non haberá premio récord, entre outros.
Pola súa parte, o rexedor manifestou que se trata dunha cita consolidada no calendario do municipio, fomentando o deporte e o estilo de vida saudable ao tempo que se amosan os valores paisaxísticos. Ademais, expresou as súas desculpas á veciñanza polas molestias que poda causar.
