20190814. O Auditorio do Museo Valle-Inclán da Pobra do Caramiñal acollerá o venres 23, ás 20.30 horas, a presentación do libro A Cuatro Voces. Trátase dun conxunto de 19 relatos de 4 autoras, no que colabora a pobrense María Pérez Prol, xunto con Silvana Lameiro Micciche, Maria João Matos e Ruth Ríos, así como a ilustradora Jun Fernández.
As catro escritoras coñecéronse en 2014 durante un curso de escritura creativa na Universidade de Santiago de Compostela. Tras realizar diversos proxectos literarios por separado, decidiron unir a súas voces nesta obra. O resultado é un conxunto de narracións diferentes entre si, con temas que van desde o intimista ata o fantástico, a ciencia ficción ou o realismo sucio de personaxes nocturnos.
A o longo dos relatos descóbrense os persoais universos de cada unha delas: o mundo fantástico e escuro de María Pérez Prol; o lirismo con reminiscencias de Virginia Woolf da portuguesa Maria João Matos; as personaxes ao límite e o humor surrealista de Silvana Lameiro Micciche; ou os seres solitarios das hiperconectadas cidades actuais de Ruth Ríos.
Ademais, as autoras quixeron enriquecer a obra con ilustracións para cada un dos relatos, vendo como se interpretaban desde outra perspectiva. Foi así como decidiron contar con outra presencia feminina, a da ilustradora viguesa Jun Fernández, formada na facultade de Belas Artes de Pontevedra e na Akademie für Illustration.
O acto será presentado pola concelleira de Cultura da Pobra do Caramiñal, Patricia Lojo.