20190821. O Concello de Boiro abriu a convocatoria de axudas para a conciliación laboral, persoal e familiar do 2019. Este ano incorpórase novidades coma a redución do tempo de empadroamento requirido ou as circunstancias que obrigan á contratación de servizos profesionais e de coidado das crianzas.
A convocatoria ten como finalidade axudar economicamente ás familias que por motivos laborais, de formación ou procura activa de emprego e de asistencia sanitaria, precisen contratar os servizos de gardarías privadas ou coidados profesionais para que se fagan cargo de menores con idades comprendidas ente os 0 e os 12 anos.
Unha vez as nenas e nenos estean escolarizados, esta axuda só se poderá percibir polos servizos contratados para ser prestados fóra do horario escolar. As axudas consistirán no reembolso do 50% do gasto realizado entre o 01-11-2018 e o 30-09-2019, cun límite máximo de 2.500 euros por menor. Entre outros requisitos, as familias deben estar empadroadas no Concello boirense e ter uns ingresos inferiores a 5’5 veces o IPREM.
As solicitudes de axuda, xunto coa documentación requirida, deberán presentarse no Rexistro Xeral do Concello como máximo ata o 1 de outubro do 2019, inclusive, de 09.00 a 13.30 horas. Para mais información pódense consultar as bases da convocatoria na web do www.boiro.org, na páxina de Facebook do Concello ou chamando ao Centro de Información a Muller (CIM) de Boiro no teléfono 981 84 99 60, marcando a extensión 1250.
