20190808. Tal e como anunciamos onte, o Concello de Boiro vén de comunicar a adopción da medida de suspender provisionalmente das súas funcións ao xefe da Policía Local despois da investigación iniciada como consecuencia do escrito presentado por un total de 11 axentes e ex-axentes que acusaban a Manuel Feás de presuntas irregularidades.
Unha vez recadados tódolos documentos cos que poder verificar estas acusacións, o Concello de Boiro trasladou ao Xulgado de Instrución Número 2 de Santa Uxía de Ribeira a denuncia contra o funcionario polos feitos relatados no escrito presentado no Rexistro municipal o pasado xoves.
O rexedor José Ramón Romero pide prudencia porque “hai que respectar o principio de inocencia e agardar a que se comprobe toda a documentación recadada e verificar si se demostran con ela os delitos dos que se lle acusa.” Así, o alcalde deixou o caso en mans da xustiza declarando que non se van proporcionar máis datos “ata que non teñamos unha resolución clara” para “respectar e manter a intimidade das persoas implicadas xa que é un asunto moi delicado.”
