20190806 A ría de Arousa foi escenario esta fin de semana dun elevado número de varamentos de cetáceos, concretamente golfiños e arroaces, no litoral dos concellos de Rianxo, Boiro, A Illa, O Grove e, pola banda da ría de Pontevedra, tamén en Sanxenxo. Segundo informou dende o seu Facebook a Coordinadora para o Estudo dos Mamíferos Mariños (CEMMA), en cada un dos devanditos concellos localizouse un cetáceo (catro golfiños e un arroaz) varado ou en risco de varar. De todos eles, finalmente faleceron dous (dous machos novos con síntomas de desnutrición). O CEMMA cualifícao de “varamento masivo”.
Respecto dos encallamentos e das súas posíbeis causas, aínda están por determinar, pero soe ser decisivo, no caso de animais de cuarta idade, permanecer a carón dunha manda ou familia para garantirse o sustento e a supervivencia. Sexa como sexa, en boa parte dos casos os golfiños acaban varados nas praias por mor da actividade pesqueira (fican atrapados polas redes e aparellos ou mesmo poden chegar a ser mancados por elas ou polas embarcacións).
Respecto dos golfiños mortos, un deles foi atopado no porto de Tragove de Cambados e outro foi visto con vida no litoral de Rianxo e máis no de Boiro, para acabar varando na praia de Ladeira do Chazo, no litoral boirense.
Segundo confirmou o CEMMA, os varamentos masivos non son frecuentes nas nosas costas e que ao longo de 2019 aínda non se rexistrara ningún.