20190830 O bus de Creactivity, o proxecto itinerante de La Caixa para promover o talento científico e tecnolóxico que as nosas nenas e nenos carrexan de maneira innata, estivo estes días en Ribeira, ofrecendo oportunidades prácticas (todo tipo de actividades lúdico-científicas) para orientar os intereses da rapazada cara ao universo STEM (Ciencia, Tecnoloxía, Enxeñaría e Tecnoloxías). O vehículo, que aínda ten este venres as súas portas abertas (até as 20.30 horas) na explanada portuaria ribeirense, foi visitado estes días por centos de nenas e nenos, individualmente e coas súas familias. O autobús ofreceulles aos rapaces (de idades comprendidas entre os 6 e os 16 anos) un espazo de experimentación de primeira orde, a xeito de casa das ciencias móbil.
Segundo informaron as responsábeis-monitoras do vehículo, Creactivity é un espazo deseñado para “espertar o enxeño, a destreza e a creatividade de nenas e nenos, achegándolles obradoiros con materiais cotiáns e ferramentas de baixa e alta tecnoloxía, co fin de axudalos a dar vida á súas propias ideas”.
O bus de Creactivity, unha unidade móbil accesíbel, está equipado con bancos, mesas de traballo e diversos recantos para todo tipo de probas de investigación ao servizo dos cativos visitantes. Así, hai unha zona de mecánica (con engrenaxes, mecanismos varios, bolas e máquinas de pinball), unha zona de vento, unha zona de electricidade e unha zona de luz, que serve para achegar á rapazada ao sistema stop motion de creación audiovisual.
A parada destes días en Ribeira é a derradeira recalada do bus na comarca de Barbanza, despois de que percorrese Rianxo, Boiro e A Pobra do Caramiñal. Previamente o percorrido pasou por Cedeira, Bueu, Mondoñedo, Carballo, Cangas ou Vilagarcía, entre outras vilas e cidades.
Baseado na metodoloxía de traballo e formación do deseño intelixente (Design Thinking), o espazo Creactivity busca que os participantes realicen creacións e construcións científicas ou tecnolóxicas, xa sexa de forma individual ou colectiva, que respondan os retos suxeridos ou aos seus propios desafíos a través da manipulación, observación e exploración de materiais e fenómenos. O Creactivity inspírase no movemento Tinkering liderado polo Exploratorium de San Francisco.
