20190826. O concello de Boiro acollerá ao longo desta semana un faladoiro e un 0contacontos na praia. A primeira destas actividades terá lugar o mércores 28, ás 11.00 horas, na Biblioteca Municipal situada na Casa da Cultura. Dirixida a mocidade de 11 a 16 anos, realizaranse microdebates de temas actuais que os propios asistentes poderán suxerir. Desta maneira, os asuntos a abordar variarán en función dos intereses do público asistente. Para acudir a esta cita é necesaria a inscrición previa, a cal se pode formalizar na propia biblioteca.
Por outra banda, a segunda proposta celebrarase o venres 30, ás 20.00 horas, na praia de Barraña, concretamente á altura da Avenida Avellaneda. Así, a biblioteca sae á rúa coa pretensión de ofrecerlle aos cativos a partir de 4 anos unha nova forma de achegarse á lectura. A entrada é de balde e non é necesaria inscrición previa.
