20190809 Hai persoas que pasan pola vida e só deixan bos recordos e, malia o paso do tempo, seguen a ser motivo de saudade e respecto e exemplo de comportamento para os que veñen e virán. Unha destas persoas foi sen dúbida Plácido Betanzos (1952-2018), o benquerido mestre e político de Palmeira, que tivo (e segue a ter, mesmo despois do seu falecemento) a estimábel (e non tan común como sería de desexar, sobre todo no ámbito da política) capacidade para ser compañeiro e amigo entre compañeiros e amigos de todo tipo de ideoloxías, pareceres e puntos de vista. Este venres a cidade de Ribeira homenaxeouno nun ateigado salón de plenos do consistorio, ante a presenza dun centenar de persoas. O motivo foi a presentación do seu libro póstumo, Relatos e lembranzas.
O acto veu da man da Comisión de Homenaxe a Plácido Betanzos coa colaboración do Concello. Na homenaxe, na que se fixo un emotivo percorrido pola vida e traxectoria de Plácido, poñendo o foco no seu espírito dialogante e aberto, interviñeron Santi García, membro da devandita comisión e deseñador e coordinador da publicación póstuma, amais e curmán de Plácido; Sofía Betanzos, filla do autor homenaxeado; e máis o alcalde Manuel Ruiz Rivas.
Malia estar prevista a presenza de Goretti Sanmartín, ex vicepresidenta da Deputación da Coruña, non puido acudir por motivos de saúde.
Presentou e moderou a cita Olegario Sampedro, compañeiro de profesión de Plácido e compañeiro (tamén) de vivencias, inquedanzas e andainas. O acto incluíu, no seu ecuador, un recital da poeta Marta Pedrosa acompañada musicalmente de José Luis Olveira. A publicación póstuma foi impresa pola Deputación da Coruña.
O evento foi ante todo un emotivo intercambio de lembranzas e emocións. Por exemplo as compartidas por Olegario Sampedro, que recordou “a voz vigorosa” do homenaxeado e a pegada que deixou: “As ideas universais de Plácido nunca poderán ser desmanteladas ou derrubadas”. Os recordos tamén foron o miolo das intervencións de Sofía Betanzos e Manuel Ruíz Rivas, a primeira recreando a súa nenez e como o seu pai lle inculcou, dende pequena, o amor polos libros, a lingua e a cultura popular, o segundo, o rexedor ribeirense, facendo un percorrido pola traxectoria política de Plácido Betanzos: “El sentíase feliz na política, tardou moito en aceptar a decisión de deixala, estou convencido de que faleceu sendo político”. O alcalde tamén agradeceu a participación no acto da cidadanía (un acto “sinxelo e bonito”) e das entidades que fixeron posíbel o libro Relatos e lembranzas. Amais, salientou a implicación de Goretti Sanmartín na publicación da obra póstuma e concluíu: “Na vida recollemos o que sementamos, e Plácido sementou moitos abrazos, moito agarimo e moita camaradería; era o meu amigo, a pesar das diferenzas ideolóxicas”.
Unha rúa de Palmeira leva o seu nome
A homenaxe de hoxe non foi nin será a última. Como lembraremos, recentemente foi inaugurado en Palmeira un paseo da vila co seu nome, nun acto no que enxalzou “o seu carácter loitador, alegre, afábel e optimista”, comprometido co nacionalismo galego, co respecto pola pluralidade de ideas e coa diversidade e coa mellora da calidade de vida das súas veciñas e veciños.
Plácido Betanzos foi profesor en varios institutos e rematou a súa carreira docente no IES Leliadoura de Palmeira. Compaxinou este labor co traballo político no Concello, onde foi edil do BNG entre os anos 1992 e 2002 e candidato á alcaldía de Ribeira nos anos 1995 e 1999. Amais, tamén foi tamén un activo comunicador e froito desta vertente literaria, xornalística e creativa abrollaron escritos como os que se presentaron este venres no salón de plenos do consistorio, ou senlleiros artigos como Bágoas na chuvia, que foi unha das primeiras reflexións-denuncia desenvolvidas na nosa comarca e en Galicia sobre o problema da violencia machista.
