As peñas de Boiro festexarán por todo o alto o segundo ano de vida da romaría

14 Agosto 2019

20190814. A segunda edición da Romaría das Peñas celebrarase no boirense recinto da Cachada o sábado 24, agardando acadar a cifra do pasado ano de 2.500 asistentes e de 35 peñas participantes. Así o anunciaron esta mesma mañá Quin Riveiro, Goxi, David Laíño, Vanesa Deán e Noe Castaño, membros da Asociación de Peñas.

Concibida para despedir o verán, este festexo está pensado e programado coma romaría, polo que se desenvolverá ao longo de todo o día, con dúas partes diferenciadas e xantar. A primeira delas, sesión vermú, estará a cargo dun grupo tradicional e a actuación da orquestra Neverloura, coñecida polas súas versións e que asumirá a tarefa de facer bailar aos presentes.

A continuación, chegará a hora de comer. Por esta razón, os asistentes disporán de diversos postos onde adquirir polbo, churrasco ou empanada, entre outros.

Xa pola tarde, haberá xogos para maiores e cativos, buscando a participación e diversión “máis que fomentar a competición.” Deste xeito, anunciaron que aos xogos tradicionais das peñas se sumarán outros novos, así como a festa da escuma, toro mecánico e pista esvaradía. A partir das 19.00 horas, darán comezo as sesións de DJ’s, tanto locais coma foráneos, buscando a diversidade musical para satisfacer a tódolos peñeiros e peñeiras. En total ao redor de 15 horas de diversión ininterrompida ata as 03.00 horas do día seguinte.

Nesta ocasión, a entidade decidiu colaborar con Cáritas, polo que se colocarán huchas para recadar diñeiro co obxectivo de mercar o material escolar necesario para o vindeiro curso a nenos e nenas de familias con dificultades económicas. De feito, por parte das peñas contribuirase porque tamén queren transmitir “a idea de colaborar, da solidariedade, da contribución á nosa comunidade.”

A entrada é de balde e atópanse xa á venda as pulseiras que dan acceso ás actividades a un prezo de 2 euros. Desde a asociación fixeron fincapé na prohibición de entrar con vidro, polo que venderán vasos reutilizables; así como en que cada un recolla o seu lixo e en beber con moderación. Respecto a isto último, destacaron que “se eres menor sabes que está totalmente prohibido que consumas alcol e que infrinxir esa norma pode supoñer un grave problema para os teus pais”, e incluiranse os mesmos controis que no Día das Peñas.

Ademais, indicaron que esta festa é posible grazas ao que recadan, polo que o botellón non lles axuda, pero “se o fas, polo menos faino con respecto ó medio e ós demais.” Tampouco se esqueceron de lembrar a importancia do respecto ao resto de persoas, así como protexer e coidar ás compañeiras e compañeiros.

Por todo isto, agardan repetir o éxito da pasada edición, na cal houbo moita xente e sen incidentes.

Por último, expresaron o seu agradecemento a tódalas peñeiras e peñeiros, aos comercios, aos negocios da hostalería, ao Concello, a Protección Civil, a Policía Local, a Garda Civil, ao Servizo de Limpeza do Concello de Boiro e aos demais compañeiros da Asociación de Peñas.

Outros artigos

Barbanza Arousa recibe as primeiras adhesións ao SICTED

A Mancomunidade Barbanza Arousa, en consonancia coa súa estratexia de colaboración público-privada, continúa este ano coa implantación do Sistema Integral de Calidade Turística en Destino, SICTED, entre os axentes turísticos do territorio. Nesta ocasión, a primeira...

+

Publicidade

Revista en papel

Opinión

“Celebrando a  Rosalía de Castro”. Antía Pereira

“Celebrando a Rosalía de Castro”. Antía Pereira

“Celebrando a Rosalía e o seu día celebramos o que nos une, o que nos representa e o que nos move. Poucas figuras concitan ó seu redor a unanimidade que convoca Rosalía. E iso en boa medida porque ela soubo tocar as cordas, unha a unha, aínda que fose de distinto...